करिब दुई महिनापछि बल्ल सरकारले नेपाल राष्ट्र बैंकको गभर्नरको नियुक्ति गरेको छ। मंगलबार बसेको मन्त्रपरिषद् बैठकले अर्थविद् डाक्टर विश्वनाथ पौडेललाई गभर्नर पदमा नियुक्त गरेको हो।
मंगलबार बालुवाटारमा बसेको मन्त्रिपरिषद् बैठकले पौडेललाई गभर्नर नियुक्त गरेको कृषिमन्त्री रामनाथ अधिकारीले जानकारी दिए। उनी राष्ट्र बैंकका १८औँ गभर्नर बनेका हुन्।
अर्थ मन्त्रालयमा आजै बसेको गभर्नर सिफारिस समितिको बैठकले अर्थविद् पौडेलसहित राष्ट्र बैंककै कायममुकायम गभर्नर डा। नीलम ढुंगाना र पूर्वसचिव दिनेश भट्टराईको नाम सिफारिस गरेको थियो। त्यसो त पौडेल गभर्नर बन्ने यसअघि नै सुनिश्चित थियो।
नेपाली कांग्रेसका सभापति शेरबहादुर देउवा र प्रधानमन्त्री एवं नेकपा एमालेका अध्यक्ष केपी शर्मा ओलीबीच पौडेललाई गभर्नर बनाउने पूर्वसहमति भएको थियो।
मंगलबार पनि दुई नेताले छलफल गरेका थिए। सोसँगै समितिको बैठक बसेको थियो। नाम सिफारिस भएसँगै मन्त्रिपरिषद्ले आजै गभर्नर नियुक्तिलाई टुंग्याएको हो।
