अमेरिकन चर्चित र्यापर ‘लिल पम्प’ नेपाल आउने भएका छन्। ठमेलस्थित एलओडी क्लबमा यही असोज १६ गते हुने कार्यक्रममा उनले आफ्नो प्रस्तुति दिने भएका छन् । उनको सबैभन्दा बढी चर्चित गीत गुजी ग्याङ रहेको छ।
एलओडी क्लबका सञ्चालक राजु सिंहले लिल पम्पको कार्यक्रमका लागि सम्पूर्ण तयारी पूरा भइसकेको बताए। उनका अनुसार सोही दिन हुने कार्यक्रममा क्लबले शुल्क लिने व्यवस्था गरेको छ। भिआइपी र सामान्य गरेर टिकटको मूल्य निर्धारण गरिएको छ।
भिआइपीमा प्रवेश गर्न दर्शकहरूले ३५ सय र सामान्य स्थानमा रहेर हेर्न २५ सय रुपैयाँ तिर्नुपर्ने सिंहले जानकारी दिए। दर्शकहरूले सोही दिनको टिकट खल्ती एप्सबाट खरिद गर्न सक्ने सिंहले बताए।
यसअघि पनि एलओडीमा बलिउड तथा हलिउडका कलाकारले प्रस्तुति दिइसकेका छन्। बलिउडका नेहा कक्कड, अर्मान मल्लिक इण्डियन आइडल पवनदीपलगायतका धेरै गायकहरूले प्रस्तुति दिइसकेका छन्।
त्यसैगरी, टिम्मी ट्रम्पेट, टोपिक, स्टेबीन बेन, वाल्सी फायर ज्योतिका टांग्रीलगायतका कलाकारले समेत सो गरिसकेका छन्।
एलओडी क्लब ‘लर्ड अफ द ड्रिंक्स’ विश्वकै उत्कृष्ट क्लबमध्ये ५० औँ स्थानमा परेको क्लब हो। केही समयअघि क्लब पुनः ‘डिजे म्याग टप १००’ को नोमिनेसनमा परी छनौटमा परेको हो। युकेस्थित डिजे म्यागले छनौट गर्ने सन् २०२४ का लागि सय उत्कृष्ट क्लब क्याम्पियनमा एलओडी क्लबले ५० औँ स्थानमा राखेको हो।
यसमा पाँच सय क्लब सहभागी भएका थिए। डिजे म्यागले हरेक वर्ष विभिन्न मुलुकमा रहेका उत्कृष्ट क्लबहरूको छनौट गर्छ। म्यागमा विश्वभरका सय उत्कृष्ट डिजे क्लबको सहभागी रहने गर्छ।
